RSSB Tigers yageze muri ½ cya BAL 2026 nubwo yatsinzwe na FUS Rabat yo muri Maroc amanota 99-98, icyakora ikomeza mu kindi cyiciro kubera ikinyuranyo kuko yatsinze umukino ubanza ku manota 95-72.
Uyu mukino wo kwishyura wa ¼ wabaye ku mugoroba wo ku Cyumweru, tariki ya 24 Gicurasi 2026.
Tigers yasabwaga gutsinda cyangwa yanatsindwa bikaba ku kinyuranyo gito kitarenze icyo yatsinze mu mukino ubanza.
FUS Rabat yatangiye umukino neza cyane itsinda amanota menshi ibifashijwemo na William Perry. Agace ka mbere karangiye FUS iyoboye umukino n’amanota 32-14.
Mu gace ka kabiri, Tigers yinjiye mu mukino Craig Randall atangira gutsinda amanota menshi cyane bityo itsinda muri aka gace ku manota 30-19.
Igice cya mbere cyarangiye FUS Rabat yatsinze RSSB Tigers amanota 51 kuri 44.
Mu gace ka gatatu, Mangok Mathiang na Axel Mpoyo bakoreye mu ngata Randall bongera amanota batsindaga.
Muri aka gace, umukino wegeranye cyane, agace ka gatatu karangira FUS Rabat ikiyoboye umukino n’amanota 71-70.
Agace ka nyuma kari injyanamuntu amakipe yombi yegeranye bikomeye kuko yagendanaga mu manota. Muri aka gace, amakipe yombi yanganyije amanota 28-28.
Muri rusange, umukino warangiye FUS Rabat yatsinze RSSB Tigers amanota 99 kuri 98.
RSSB Tigers yakomeje muri ½ kuko umukino ubanza yatsinze ku manota 95-72 bityo ikomeza kubera ikinyuranyo cy’amanota.
Mu mukino wabanjirije uyu, Al Ahly yigaranzuye ASC Ville de Dakar amanota 87-76.
Muri ½, RSSB Tigers izahura na Al Ahly yo mu Misiri ku wa Gatatu, tariki ya 27 Gicurasi 2026.
